O florido pénsil, o acontecemento teatral da pasada temporada, volve aos escenarios en 2012

Santiago de Compostela, 31 de xaneiro de 2012.- O florido pénsil, o espectáculo de Emedous sobre a escola do franquismo que revolucionou o ano pasado o panorama teatral galego, volve aos escenarios en  2012 con máis dunha ducia de datas en localidades galegas. A obra pechou o 2011 cun rexistro de 12.000 espectadores en 23 funcións, e está protagonizada por cinco dos mellores actores da escena galega: Antonio Durán Morris, Xosé Manuel Olveira Pico, Josito Porto, Alfonso Agra e Federico Pérez poñen cara ás vivencias entre cómicas, duras e tenras dun grupo de rapaces na escola do franquismo.

O cartel de aforo completo foi unha constante na primeira xira de O florido pénsil. A proposta, que adapta o galego un texto de Andrés Sopeña e dirixen Fernando Bernués e Mireia Gabilondo, tivo mesmo que habilitar datas suplementarias en varios teatros para satisfacer a petición do público. Para a súa produción Emedous contou coa colaboración da Axencia Galega das Industrias Culturais (Agadic) e co apoio do Centro Dramático Galego. Nesta segunda tirada, o espectáculo visitará Vilagarcía de Arousa (4 de febreiro), Pontevedra (10 e 11 de febreiro), O Barco de Valdeorras (17 de febreiro), Ferrol (18 de febreiro), Vigo (24 e 25 de febreiro), Oleiros (3 de marzo) e Santiago (28, 29, 30 e 31 de marzo de 1 de abril).

O florido pénsil conta as vicisitudes dun grupo de rapaces sometidos á absurda e ilóxica brutalidade do sistema educativo que dominou a España da posguerra. A través dos seus protagonistas descóbrese un fresco no que se suceden as tribunas desde as que o franquismo aleccionaba á poboación: en primeiro lugar, a escola, centro de operacións fundamental para a propaganda do ideario fascista; máis tarde, o cinema de barrio, a radio familiar, a igrexa e a prensa. Pola obra pasan heroes das películas, mestres casposos, mozos máis ou menos espabilados, Roberto Alcázar, o NO-DO, o Tebeo e os curas.

O texto foi adaptado por Sandra Romarís, Emilio Cao e Xocas López para Eme2 para a súa posta en escena en galego, acomodándoo tamén ás especificidades da época en Galicia.