Espectáculo, xestión e comunicación únense para satisfacer as túas necesidades
Somos unha empresa que produce, distribúe e xestiona produtos e servizos culturais, coa intención de contribuír ao aproveitamento do ocio como instrumento de formación persoal e de relación social. Vinculados ao sector das artes escénicas ofrecemos servizos e produtos culturais de xestión, produción, comunicación e distribución innovadores, ligados aos discursos artísticos e culturais vixentes e de actualidade na sociedade.
Desde o teatro, pasando pola danza e por calquera tipo de arte escénica, ofrecemos produtos novidosos a través dunha xestión integral e planificada. Espectáculo e comunicación unidos para satisfacer as necesidades propias de cada cliente.
Na meta (Sálvese quen poida) é unha comedia negra sobre o éxito e o fracaso, unha revisión humorística sobre o camiño cara á meta de cadaquén e o que nel se perde e se gaña. Unha nai de armas tomar saca a súa metralladora verbal e fai saltar polos aires algúns dos piares da sociedade. A nai viúva e a filla solteira reproducen dinámicas de dependencia, tiranía e submisión. Un escritor novo, que vén de triunfar no teatro, diríxese cara á meta das dúas espectadoras que orquestran esta comedia cáustica. Unha primeira parte na que se fan as maletas e unha segunda na que se desfán. Unhas personaxes que deixan saír os monstros que a meirande parte das persoas agochamos. O riso terrible do coñecemento.
+Xa se poden descargar desde a web de Eme2 Emoción&Arte as ráfagas sonoras compostas por Anxo Graña para o espectáculo Sexo? Por que non? Os jingles atópanse dentro da carpeta que contén o kit promocional da obra; basta con ir á páxina do espectáculo e picar en 'Descarga o dosier de prensa'.
+
O sexto número da revista Ao Vivo Música, editada pola Axencia Galega das Industrias Culturais (Agadic) e elaborada por Eme2 Emoción & Arte, acaba de editarse. A publicación, coa que se pretende apoiar aos grupos galegos, distribúese nas salas de concertos adheridas á Rede Galega de Música ao Vivo, e conta con apartados dedicados a músicos e artistas como Triángulo de Amor Bizarro, bOnOvO, Anxo Lorenzo, Ruxe-Ruxe ou Radio Océano, entre outros. O exemplar pode consultarse aquí.
+Máis de 80 contos colectivos construíronse ao longo dos últimos meses en 30 vilas e cidades galegas, no marco do Contador, unha iniciativa posta en marcha pola Secretaría Xeral de Política Lingüística na que participaron activamente arredor de mil persoas.
+
Eme2 Emoción&Arte estreará o próximo 16 de abril, nas Pontes de García Rodríguez, o espectáculo Sexo? Por que non?, baseado nos textos de Dario e Jacopo Fo e Franca Rame. Con Mercedes Castro sobre as táboas e baixo a dirección de Álvaro Lavín, Sexo? Por que non? é unha comedia trepidante na que desde Adán e Eva ata os nosos días se mostran situacións cotiás en torno ao encontro carnal e ao pouco que del sabemos na sociedade occidental.
+
RSS